Vebjørn

Oselvaren Vebjørn

Vebjørn er bygd på Oselvarverkstaden i 2002, som bygg nr. 26.

I båtsamtalen med Harald Dalland fortalte eg at båten skulle brukast mykje i Vatlestraumen, der eg bur. Eg ville ha ein god og stødig ro- og fiskebåt. Ein trygg båt for båe store og små. Dessutan ville eg ha ein råseglrigga båt.

Harald kom fram til ein 10 ¼ alning, som reiser seg noko tidleg  i stamnen. Eg kan då lettare manøvrere båten med årar i den sterke Vatlestraumen. Han er godt lagt ut, slik at eg har god løft i båten når eg trekkjer bruket. Båten har samstundes fått ein god lengd for å vere egna  til segling. 

Resultatet vart godt. Når eg seglar på god bidevind, oppstår det eit logisk og harmonisk tilhøve mellom båt, rigg og folk som eg trur ein berre kan oppleve i ein råseglrigga båt. Han er ein ypperleg turbåt, og lar seg enkelt trekkje opp i fjøra om kvelden.

Eg har ofte undrast over at råseglet mest er teken ut or bruk på oselvarfæringen. Er ikkje dette eit paradoks, når vi av pussar og steller med så mange andre sider av kystkulturen vår ? Eg var nysgjerrig og ville ta i bruk att råseglet på oselvarfæringen. Eg vart ikkje skuffa.